चर्चित चित्रकारले जस्तो दमकडाका कुशलले बनाए धार्मिक सहिष्णुता सम्बन्धी चित्र

बोली । माघ २३ – हेर्दा सामान्य तर धार्मिक सहिष्णुताको रुपले गहिरो अर्थ बोकेको चित्र बनाएर दमकडा माध्यमिक विद्यालयका कुशल पंगेनी जिल्लाभरीमा प्रथम भएका छन् ।


ईसाई धर्मको संकेत दिने क्रस चिन्हको बाला लाएको पुरुषको हात र रातो चुरा लगाएकी महिलाको हातले मिलेर नेपालको नक्सा उठाएको चित्र बनाएर तानसेन ९ दमकडाका कुशल पंगेनी जिल्लाभरीमा प्रथम भएका हुन् । सनराईज पब्लिक स्कुल माथागढी २ ले आयोजना गरेको जिल्ला स्तरिय चित्रकला प्रतियोगितामा कुशलले कुनै चर्चित चित्रकारले बनाएको गम्भिर अर्थ बोकेको चित्र बनाएका हुन् ।


चित्रको चार कुनामा हिन्दु धर्म चिनाउने मन्दिर, मुस्लिम धर्म चिनाउने मस्जिद, लुम्बिनी चिनाउने असोक स्तम्भ र स्वयम्भु रहेका छन् । हिन्दु महिला र ईसाई पुरुषको हातले उठाएको नेपालको नक्सा भित्र ओम, चन्द्र तारा, त्रिशुल सहितको डमरु र क्रस चिन्ह बनाईएको छ ।


चित्रको बिचमा नेपालको झण्डा बनाईएको छ भने चित्रको माथीतिर अंग्रेजीमा धर्म र तलतिर सहिष्णुता भनेर लेखिएको छ । चित्रको ब्याकग्राउण्डमा निलो आकाश र सेतो बादलको बिच बिचमा शान्तिको प्रतिक परेवाहरु उडिरहेको देखिन्छ ।


आफुले मानिरहेको धर्मको पक्षमा जस्तो सुकै कुतर्क गर्न पनी तयार हुने व्यक्तिहरुलाई यो तस्विरले व्यंग्य गरेको छ । सबै धर्मको सम्मान र सहिष्णुता भयो भने चित्र जस्तै नेपाल पनी शुन्दर हुन्छ भन्ने सन्देश चित्रले दिएको छ ।

Leave a Reply

Your email address will not be published.